Биhиги Аан дойдутааҕы оҕо көмүскэлин күнүнэн Дьиэ кэргэн, Оҕо саас сылын чэрчитинэн кырачаан дьон кэнсиэрин нэһилиэк олохтоохторугар бэлэх ууннубут. Манна быйылгы үөрэх дьылыгар араас таһымнаах күрэхтэргэ ситиһиилэммит ыллам ырыалар ылланнылар, эрчимнээх үҥкүүлэр көтө дайдылар, хомоҕой хоһооннор чугдаардылар. Ол курдук “Сэлээппэлээх уолаттар”, “Үтүлүкчээн”, “Летчик буолуом”, “Тугутчаан” үҥкүүлэри көрөөччүлэр бэрт истиҥник ылыннылар, оттон кырачаан хоһоон ааҕааччылары София Попованы, Милана Платонованы, Виктория Секованы сөҕө-махтайа дохсун ытыс тыаһынан күндүлээтилэр. “Көрдөөх оркестр”, “Ложкари” ансаамыллар араас мусукаалынай үнүстүрүмүөннэргэ оонньоон болҕомтону тартылар. Кэнсиэр сүрүн дьонунан бэлэмнэнии бөлөх оҕолоро буоллулар. Кинилэр ырыа да ыллаан, үҥкүүлээн да дайан бииртэн биир сэргэх нүөмэрдээх сценаҕа таҕыстылар. Выпусниктарбыт вальстара, соҕотоҕун ыллаабыт оҕолорбут Даян Ананьев, Женя Иванова, Слава Ананьев, Гея Самсонова “биис” доҕуһуоллаах ытыс тыаһын ыллылар.
“Сулусчаан” кыра бөлөх төрөппүттэрэ, уруу-аймах дьоно оҕолорун кытта сиэтиспитинэн сценаҕа таҕыстылар, оттон кэнсиэри үлэһиттэрбит Григорий Ананьев, Мария Яковлева, Павел Платонов, Лидия Долгунова, Валерий Степанов оҕону, дьиэ кэргэни уруйдуур-айхаллыыр хоһоонунан астылар.
Түмүккэ ситиһиилээх педагогтарга, көхтөөх төрөппүттэргэ Махтал, Хайҕал суруктар туттарылыннылар. Кэнсиэртэн киирбит үп сааскы халаан уутуттан улаханнык эмсэҕэлээбит Нам улууһун Маймаҕа нэһилиэгин уһуйааныгар көмө буолуо.